Симеон Полоцкий — Стихи

Брат некий в обители смиренно живяше
и без прекословия началных слушаше.
Тамо близ бяше блато, во нем же живяху
многи жабы и воплем своим досаждаху
Молящымся иноком. Такожде случися
жабам кричати, егда жертва приносися.
Началник, не претерпев, инока послаше,
да велит им молчати ему завещаше3.
Се же рече смеяся,— а брат послушливый,
в правду посланна себе быти помысливый,
Иде к жабам и рече: «Именем Христовым
завещаю вам, жабы, не быти таковым.
Престаните отселе досадно кричати!»
Оттоле гласа тамо жаб не бе слышати.
Ныне же человеци во церкви стояще,
молбы си при безкровной жертве приносяще
Многим глаголанием досады творяют;
речеши ли молчати: никако слушают,
Еще огорчившеся хулят иерея,
обличения злобы не любят своея.
Наипаче щекочут язычныя бабы,
досаждающе паче, неже овы жабы.
Тщитеся убо, бабы, жабы подражати,
во время жертв духовных глас свой удержати!

1678

Крест пречестный церкве слава,
На нем умре наша глава
Христос Господь, всех спаситель,
Кровию си искупитель.
Хотяй дело
си весело
Совершити,
должен быти
Креста чтитель
и любитель.
И от него все дела начинати‎ (в распятом на нем вину уповати.)
Он бо обыче тех благословити, (и же крест на ся тщася возложити.)
В началех дел си и конец дарует, (‎какова в делех кто благотребует.)
Крест на демона мечь от бога даны‎ (и на вся, и же гонят христианы.)
Сим враг Голиафд адский посечеся,‎ (и жало смерти грех в конец сотреся.)
Сей царем верным
в бранех помогает,
Нечестивыя
враги истребляет.
Он православным
есть защищение,
гонителем же
в водах топление.
Его зде знамя
впереде полагало,
его те силы,
царю наш, желаю.
Да та тя вславит, яко Константина,
чтителя суща приснодевы сына.
Да будет ти крест, яко столп огненный
в нощи, а во дни — облак божественный.
Щит твоим людем,
страх же враждующым,
на христианы
со мечем идущым.
Сим Христос враги
своя победил есть,
да христианы
от варвар спасеши,
сам в силе его
много лет живеши.

Чин купецкий без греха едва может быти,
на многих бо я злобы враг обыче лстити;
Изрядное лакомство в купцах обитает,
еже в многия грехи оны убеждает.
Во-первых, всякий купец усердно желает,
малоценно да купит, драго да продает.
Грех же есть велий драгость велию творити,
малый прибыток леть есть без греха строити.
Вторый грех в купцах часто есть лживое слово,
еже ближняго в вещех прелстити готово.
Третий есть клятва во лжу, а та умноженна,
паче песка на брезе морстем поолженна.
Четвертый грех татбою излишне бывает,
таже в мире в мерилех часто ся свершает, —
Ибо они купуют в меру велику,
а внегда продаяти, ставят не толику.
Инии аще меру и праву имеют,
но не права мерити все вещи умеют.
Инии хитростию вещы отягчают,
мочаще я, неции худыя мешают.
А вся сия без греха не мощна суть быти,
яко Бог возбраняет сии луквства творити.
Пятый есть грех: неции лихоимтсва деют,
егда цену болшити за время умееют;
Елма бо мзды чрез время неко ожидают,
тогда цену вящшую в куплях поставляют.
Шестый грех, егда куплю являют благую,
потом лестно ставляют иную вещь худую.
Седмый грех, яко порок вещы сокривают,
вещь худую купующим дают.
Осмый, — яко темная места устрояют,
да худыми куплями ближние прелщают,
Да во темности порок купли да не узрится
и тако давый сребро в купли да прелстится.
О сынове тмы люты! Что сия творите?
Лстяще ближне вашы, сами ся морите.
В тму кромешную за тму будете ввержени,
от света присносущна вечно отлучени!
Отложите дела тмы, во свете ходите,
да взидите на небо, небесно живите!

Приветство благочестивейшему, тишайшему самодержавнейшему государю царю и великому князю Алексию Михайловичу, всея Великия и Малыя и Белыя России самодержцу, о вселении его благополучном в дом, велиим иждивением, предивною хитростию, пречудною красотою в селе Коломенском

Добрый обычай в мире содержится:
в дом новозданный аще кто вселится,
Все друзи его ему приветствуют,
благополучно жити усердствуют
И дары носят от сребра и злата
и хлеб, да будет богата полата.
Нищ ли кто в злато — руце воздевает
к богу и мольбы теплы возсылает,
Да подаст здраво и щасливо жити,
им же даде в дом новый ся вселити.
Аз сей обычай честный похваляю
и сам усердно ему подражаю,
Видя в дом новый ваше вселение,
в дом, иже миру есть удивление,
В дом зело красный, прехитро созданный,
честности царстей лепо сготованный.
Красоту его мощно есть равняти
Соломоновой прекрасной палате.
Аще же древо зде не есть кедрово,
но стоит за кедр, истинно то слово.
А злато везде пресветло блистает,
царский дом быти лепота являет.
Написания егда возглядаю,
много историй чюдных познаваю:
Четыре части мира написаны,
аки на меди хитро изваяны;
Зодий небесный чюдно написася,
образы свойств си лепо знаменася;
И части лета суть изображены,
яко достоит, чинно положены.
И ина многа дом сей украшают,
разумы зрящих зело удивляют.
Множество цветов живонаписанных
и острым хитро длатом изваянных,
Удивлятися всяк ум понуждает,
правый бо цветник быти ся являет.
Едва светлее рай бе украшенный,
иже в начале богом насажденный.
Дом Соломонов тым славен без меры,
яко ваянны име в себе зверы.
И зде суть мнози, к тому и рыкают,
яко живые львы, глас испущают;
Очеса движут, зияют устами,
видится, хощут ходити ногами;
Страх приступити, тако устроенны,
аки живые львы суть посажденны.
Окна, яко звезд лик в небе сияет,
драгая слюдва, что сребро, блистает.
Множество жилищ градови равнится,
вся же прекрасна,- кто не удивится!
А иных красот не леть ми вещати,
ум бо мой худый не может объяти.
Единым словом, дом есть совершенный,
царю велику достойно строенный;
По царстей чести и дом зело честный,
несть лучше его, разве дом небесный.
Седмь дивных вещей древний мир читаше,
осмый див сей дом время имат наше…
Осмое ныне на Москве явися,
егда сей царский твой дом совершися,
Всячески дивный, красный и богатый,
велелеп извне, внутрь нескудно злотый.
В он же ти ныне вшедшу еже жити,
всем подобает приветство творити;
Достоит дары драгия даяти,
любовь и верность тако проявляти.
Кто убо богат, да идет со златом,
с сребром, с собольми к царским ти полатом,
Аз тех лишенный, дерзнух приходити
с приветным словом, тем верность явити.

Блажен муж, иже во злых совет не вхождаше,
‎ниже на пути грешных человек стояше.
Ниже на седалищех восхоте седети,
‎тех иже не желают блага разумети.
Но в законе Господни волю полагает,
‎тому днем и нощею себе поучает.
Будет бо, яко древо при водах сожденно,
‎еже даст во время си плод свой неизменно.
Лист его не отпадет, и все еже деет,
‎то желанию сердца онаго успеет.
Не тако нечестивый, ибо исчезает,
‎яко прах, его же ветр с земли развевает.
Тем же нечестивии не имут востати,
‎на суд ниже с грешницы совет правых стати.
Весть бо Господь путь правых тыя защищает,
‎путь паки нечестивых в конец погубляет.

Вскую языцы велми ся шаташа,
‎людие тщетным ум свой прилагаша.
Царие земли со князи предстаху,
‎на Бога и на Христа Его встаху.
Расторгнем узы онех глаголюще,
‎отвержим иго от нас тяжко суще.
Живый в небесех оным посмеется,
‎Господь всевидец им поругается.
Тогда в гневе к ним имать слати,
‎яростию си сердца их смущати.
Аз же поставлен в Сионе Царь быти,
‎повеление Господне явити.
Господь рече Ми: Ты Сын возлюбленный,
‎Мой еси, Мною Ты ныне рожденный.
Проси от Мене и дам Ти языки
‎в досточние вся концы вовеки.
Жезлом железным оны укротиши,
‎злые же, яко скудель, сокрушиши.
Днесь вы, царие, разум приимите,
‎судие земли вси ся накажите.
Со страхом Богу живу работайте,
‎трепетом Ему радостни бывайте.
Накажите ся, да не воз[ъ]ярится
‎Господь и з гневом на вы обратится.
От пути правды да не погибнете,
‎паче в милости Его да будете.
Блажени, иже в Бозе уповают,
‎надежду свою всю в Нем полагают.

Господи, всякую себе зело умножают,
‎иже стужающе ми люте на мя встают.
Глаголют души моей от числа их мнози:
‎несть спасения ему от Господе Бозе.
Ты же, Боже, заступник мой еси и слава,
‎Тобою возносится во честь моя глава.
Гласом аз ко Господу дерзах воззывати,
‎Он же от горы святы изволил ми вняти.
Аз уснух, спах и востах в Его благодати,
‎яко Он мя изволи от злых заступати.
Не имам ся тем людей обшедших страшити,
‎воскрес Господи, сам ся изволь защити.
Иже ми врази ту не быша поражени
‎Тобою и грешником зубы сокрушени.
От Тебе есть, Господи, мое спасение
‎и Твое есть на людех благословение.

Всегда возвах Тя Боже живый на небеси,
‎свидетелю правды им услышал мя еси.
И распространил в скорби и впредь да щедриши,
‎глас молитвы моея теплыя услыши.
Вы, сынове людстии, доколе живете
‎в тяжкосердии тщетных и ложных ищете.
Ведите, яко Господь щедрый удивил есть,
‎преподобна раба си и чудне хранил есть.
Внегда воззову к Нему изволит ми вняти,
‎от всех наветов ваших и впредь защищати.
Гневайтеся во сердцех, а не согрешайте,
‎яже в них глаголете, на ложех смывайте.
Пожрите жертву правды, в Бозе уповайте,
‎оставите лукавство, правду содевайте.
Глаголют нецыи: кто явит нам благая,
‎аще будем творити делеса правая.
Се знаменася на нас свет лица Ти Боже,
‎иже делес истинны мзду знати поможе.
Дал еси веселие до сердца моего,
‎от плод пшеницы, вина, елеа Своего.
Умножение взяша аз же имам спати,
‎во мире купно с ними и здраво востати.
Яко Ты мя в надежду, Боже, вселил еси,
‎егда о стяжании царства явил еси.

Глаголы моя изволи внушити,
‎ко званию ми уши приклонити.
Вонми молю гласу, Царю и Боже мой,
‎аз бо есмь раб Твой.
Яко аз к Тебе имамся молити,
‎Господи, утро изволи внушити.
Утро предстану Тебе, Ты узриши,
‎милость явиши.
Беззакония неси, Бог хотящий,
‎Ты, не близ Тебе будет зло творящий.
Ни лукавнуяй Тебе, приселится,
‎злый удалится.
Ты беззаконных, муж, ненавидиши,
‎глаголющия лжу, вся погубиши.
Мужа лсти крове Господь ся гнушает,
‎скоро отмщает.
Аз же на милость многу уповая,
‎вниду во дом Твой, поклон сотворяя.
К храму святому Твоему бояся,
‎сердцем страшася.
Правдою Ти мя, Господи, настави,
‎враг моих ради, путь мой весь исправи.
Яко от уст их, что право отметно,
‎сердце суетно.
Гортань их гробу точна отверзенну,
‎гноем смердящим с костми исполненну.
Языки мцаху, тщися им судити,
‎Боже, и мстити.
Да от мыслей си отпадут конечно,
‎по нечестию их отрини я вечно.
Господи, яко прогневаша Тебе
‎врази на себе.
Да веселятся, иже уповают
‎на Тя и вечну радость получают.
А Ты, Господи, Сам ся в них вселиши,
‎милость явиши.
И похвалятся весело о Тебе,
‎иже имя Тя чтимое на небе.
Любит праваго, Ты благословиши,
‎ибо любиши.
Ты сам, Господи, щитом Ти небесным,
‎благоизволом Твоим о нас десным.
Изволил еси торжество нам дати,
‎главы венчати.

Аз во братии моей бех юнейший
‎ и в дому отца моего малейший.
Пастырь бех стада овец мя родивша,
то ми вручивша.
Руце ми орган художне счиниша,
‎ и персты моя псалтир составиша.
И кто Господу возвести моему
‎ да служу Ему.
Сам мя услыша, изволи послати
‎ ангела от стад отчих мя из[’]яти.
Елеем главу помазал есть мою
‎ во службу Свою.
Братия мои добри и велицы,
‎ в очесех людских бяху человецы.
Но не бе воля Богу их избрати,
‎ силу прияти.
Аз в стретение иноплеменнику
‎ изыдох смело, чуду превелику.
Иже проклят мя идолы своими
‎ всепроклятыми.
Аз же исторг меч преострый от Него,
‎ в силе Господней обезглавих его.
От Израиля от[’]ях ругание
‎ и стенание.