Сильвестр Медведев (1641–1691) — поэт, просветитель и книгохранитель Московского печатного двора, уроженец Курска. С 1665 года учился в школе Симеона Полоцкого, под влиянием которого принял постриг и стал его ближайшим учеником и продолжателем. После смерти учителя возглавил кружок сторонников латинского просвещения в Москве.
Медведев писал силлабические стихи «на случай» — панегирики, надгробные слова, приветствия. В 1685 году представил царевне Софье проект первого московского университета. Его судьба трагически оборвалась: после падения регентства Софьи он был осуждён и казнён в 1691 году в Сергиевом Посаде.
Сборник стихотворений
Епитафион Симеону Полоцкому
Зряй, человече! Сей гроб, сердцем умилися,
о смерти учителя славна прослезися.
Учитель бо зде токмо один таков бывый,
богослов правый, церкве догмата хранивый,
Муж благоверный, церкви и царству потребный,
проповедию слова народу полезный,
Симеон Петровский, от всех верных любимый,
за смиренномудрие преудивляемый.
Им же польза верные люди насаждала,
незлобие же, тихость, кротость удивляла,
В нем же вера, надежда, любы пребываше,
молитва, милостыня, пост ся водворяше.
Мудрость со правдою им бысть зело храненна,
мерность же и мужество опасно блюденна,
Многими дары богом бе преодаренный,
непамятозлобием весьма украшенный,
Иеромонах честный, чистоты любитель,
воздержания в слове и в деле хранитель.
Ни о чесом же ином оный промышляше,
но еже церковь, нашу мать, увеселяше.
Не хоте ино божий раб что глаголати,
токмо что пользу может ближним созидати.
Ничего же ин[ого] творити любяше,
точию, еже богу непротивно бяше,
Иже труды си, многи книги написал есть,
и под рассуждение церковное дал есть;
С церковию бо хоте согласен он быти,
и ничто же противно церкве мудрствовати,
Ибо тоя поборник и сын верный бяше,
учением правым то миру показаше.
В защищение церкве книгу «Жезл» создал есть,
в ее же пользу «Венец» и «Обет» издал есть,
«Вечерю», «Псалтырь», стихи со «Рифмословием»,
«Вертоград» многоценный с беседословием.
Вся оны книги мудрый он муж сотворивый,
в научение роду российску явивый;
Обаче и сего смерть от нас похитила,
церковь и царство пользы велия лишила.
Его же пользы ныне людие лишенны.
зри сего во гробе сем кости положенны.
Душу же вручил в руце богу всемогущу,
иже благоволил ю дати везде сущу,
Да приимет ю, яко свое создание,
и исполнит весных благ его желание;
Телом со избранными даст ему восстати,
с ними ж в десней стране в веселии стояти;
И внити во вечную небесную радость,
неизглаголанную тамо присно сладость.
Полный сущи сердечных слез Иеремия,
Из глубины душевной глаголаше сия:
О! кто даст главе моей воду? кто даст токи
Очесем, да изведут слезные потоки?
Единой токмо главе слез не доставаше
Пророку, о! кто ми даст воду? вопияше.
Что же имам творити аз, сугубоглавный
Орел, егда Феодор почи царь преславный?
Сугубою главою, сугубо рыдати,
Достоит ми, сугубо имам воззывати:
Кто подаст главам моим воду? кто даст слезы
Очесам, да омочу слезами вси стези?
Амо же полечу, нигде же моего
Солнца не обретаю. Свет лица твоего,
Феодоре пресветлый! где, свете мой ясный,
Где еси, солнце мое? Яви мне свет красный,
Просвети лице твое, иссуши слез токи,
Инако не престанут слезные потоки.
Свойство мое велит мне на солнце взирати,
А без света солнечна разве унывати.
1682
* * *
Утешение Орлове
Знамения нашего орле двоеглавный,
Царствия Российского клейноде православный,
Престани от слез твоих, отрини скорбь многу,
Феодор есмь дар божий, тем же отдан богу.
А понеже от тебе сам ся удаляю,
Вместо себе двух братий тебе оставляю,
Иоанна и Петра, царей православных,
В роде, в добродетелех и в славе мне равных.
Сугубой твоей главе и солнце сугубо
Преподаю, пребуди беспечален убо.
И София, мудрости тезоименита,
В скорби твоей отрада будет знаменита.
1682
* * *
Плач сущего во Орле Царского Пресветлого Величества Воина
На персех носящего тривечную славу
Орла вашего, мою восклоняю главу.
Почерпав премногую благодать царску тамо,
Купно мудрость, мужество же крепость и камо.
Обратих убо ся на кони храброственно,
Побеждах врагов царских число множественно.
Что множественно рекох, без числа сих многи
Полки копием язвих, и попрах под ноги.
Но егда, Феодоре, премудрости полный
Царю! отыде от нас, оставль мир сей долный,
Кто мне даст мудрый совет врагов побеждати,
Кто укрепит ми сердце, оных прогоняти?
Да разбиется конь мой о гробный твой камень,
Копие, оружие вся да пожрет пламень.
Аз же вместо рек кровных, ими же во брани
Руце своих омывах, дая врагом раны,
Во слезах мои смутны ланиты омыю.
Дондеже сам под смертный меч преклоню выю.
Воин есмь, но без вождя лучше мне не жити.
Без тебе, Феодоре! лучше мне умрети.
1682
* * *
Утешение Воинов
Воине орла царска, храбрый попремногу,
Что рыдаеши мене отшедша ко богу?
Егда же бо побеждах аз врагов си с тобою,
Подая совет, разум и мужество до бою:
Един поженет тысящу, сие исполненно
Слово во мне можаше рещися явственно.
Но понеже отходя, оставив дву братий
На царствии, могущих врагов низлагати
Под нозе ти, дондеже царство их пребудет:
Два двигнета тьмы, слово полнитися будет.
Не плачи убо мене на небеси суща,
Царствие со святыми вечное имуща;
Но воински покоряй вся враги под ноги
Царем своим, противных сокрушай рати.
Оные два, венчанные царскими венцами,
Венчают твой милостынею труд и щедротами.
1682
* * *
Плач Великия России
Россия Великая, о царе великом
Откуду начну плач мой, и коим языком
Скорбь мою изглаголю? От слез и стенаний,
Несмь довольна изрещи словесных гаданий.
Откуду начну плач мой? Аще ли от сродства,
Сицевого Феодор царь бе благородства:
От царей царь, от князей князь, от славных сдавна.
Возлюбленный сын царя Алексия славна.
Откуду начну плач мой? аще ли от славы,
Славный бе самодержец славныя державы.
Откуду начну плач мой? аще ли от века,
В младом веке старого разум человека
Имел в себе, могл мудре державу хранити,
Паче старец разумех, могл ся похвалити.
Откуду начну плач мой? аще от твоея
Красоты, Феодоре, заницы моея
Несытным желанием сия всегда бяше:
Зрак красоты твоея всех увеселяше.
Откуду начну плач мой? аще ко убогим
От твоея щедроты, щедр был еси многим.
Откуду начну плач мой? аще от утешных
Словес твоих, утешал еси ими здешних.
Откуду начну плач мой? аще от твоея
Любве ко всем, кто есть неизвестен ея.
Откуду начну плач мой? с любве ли ко богу.
И сию имел еси к нему попремногу;
Вопервых любил еси бога, по сем ближних,
И множае вышнего паче, неже нижних.
Откуду начну плач мой? всяко твое дело
Егда помяну, велит рыдати ми зело.
Но кто добродетели твоя исчитает?
Вся довольно! сам, лучше токмо, их бог знает.
1682
* * *
Утешение России Великой
Россие Великая, славная державо,
Россие Великая, всем Россиям славо!
Престани от слез твоих, отрини скорбь многу,
Дар божий есмь Феодор, тем же отдан богу.
Почто мя со мертвыми плачеши живого,
Жив господь, живу и аз у него самого.
Он есть истинный живот, ему аз самому
Во веки живу, яко во веки живому.
Плачешь, добродетели моя исчитая;
Но не требуют твоих слез дела благая.
Славен пребых на земли, славнейший есть ныне,
Зря славу царя славы во все его святыне.
Красен ли бех на земли, краснейший сугубо
Днесь есмь, зря краснейшего паче всех трегубо.
Что глаголю трегубо? паче всея твари,
Тьмами тем краснейшаго всяческими дары.
За милостыню, юже сотворих убогим,
Воздаде мне всещедрый бог даром премногим.
Единым словом кончу: всяку добродетель
Воздаде мне стократце господь вседержитель.
Тем же преставши плача, Россие, твоего,
От прешествия в небо радуйся моего.
1682
* * *
Плач Белыя России
Благодетеля всех нас великого зело,
И мне, Малой России, прилично есть дело
Плакати, плачем зельным, а не утолимым,
И болети на сердце болем нестерпимым;
Зане он сыном моим яко отец бяше,
И паче неже отец оным ся являше.
Его же любовь ко мне поминая многу,
И сердцем и устнами глаголю ко богу:
Царю славы, прослави Феодора в небе,
Иже всем приступен бе во всякой потребе.
В любви ко тебе, в любве к иконам бе мнозе,
Тем же да пребывает всегда в тебе бозе.
Пребываяй бо любве, в бозе пребывает;
Сице возлюбленный твой ученик вещает.
Сего благодетелю, великому зело
Аз, Малая Россия, желаю всецело,
Пресветлому монарсе, божиему дару,
Тебе, о Феодоре! преставльшийся царю;
Зане и имя твое егда поминаю,
Многими ся слезами сама обливаю.
Иными бо не мощно воздаяти мздами
Твоих благодеяний, аще не слезами.
1682
* * *
Утешение Малой России
Царю неба, Христос господь, утешая верных,
Изрече от уст своих к ним достоверных:
Не бойся, стадо мое малое, занеже
Благоволи тебе бог дати царство, еже
Во век не отымется. Сему подражая
И аз глаголю тебе, Россие Малая:
Не бойся, стадо мое малое, о еже
Преставихся от тебе; не бойся занеже
Благоволи тебе бог вместо мене дати
Двоих братий, царствующих в его благодати,
И сии в любве своей имети тя будут,
А верности твоея к себе не забудут,
Яко от любве в своих молитвах ко богу,
Слезы проливаеши за мя по премногу.
Благодарен есмь сих слез, занеже суть сия
Тебе и мне полезны слезы преблагия.
Но егда скорби о сем рыдаеши, яко
Прейдох ко богу, молю, не рыдай мя тако.
1682
* * *
Плач Белыя России
Егда отымуется царь наш правоверный,
И мне, Белой России, стался плач безмерный.
Что же сотворю, сердечне в том соболезнуя,
Аки реки испущу слезные ми струя,
И в них якоже лебедь белый всегда буду
Плавати, и на всяк час печальна пребуду?
Лебедь гласом печальным, но приемным зело
Поет, егда дух его оставляет тело:
Соумирая и аз скорбию цареве,
Прииме дух его, боже! пою господеве.
1682
* * *
Утешение Белой России
Не рыдай мя, Белая Россие, помногу,
Феодор есмь дар божий, тем же отдан богу.
Белую тя Россию на земли в державе
Имех, ныне же имам во небесной славе
Возлюбленного души, о котором,
Прешедши дух мой в небо ко небесным хором,
Поет: возлюбленный мой бел и красен зело,
Его люблю и ему служу всегда цело;
Которому служити в его благодати,
Над тьмами тем царствами, есть то царствовати.
1682
* * *
Подпись к портрету царевны Софьи
Какова в царском лицы премудрость сияет,
Какова честь в очесех и в устех блистает!
Та твоим, о Россия, царством обещанна,
От древних дедов тебе защищать созданна,
Тот имени твоего крепкая защита,
В неоранней варвару земле знакомита,
Клятвопресупных знамен полки преломивша
И неумягчаемых сердца умягчивша,
В начале ее трие монархи случились,
С адриацким львом в крепки рати ополчились,
Благочестье, надежда в божией десницы,
Ту крайно прославляют девичестии лицы,
Правдодержанна сердцем великожеланна
И крепки рати в поле вести не мотчанна,
Ибо равнителен смысл и победоносен,
Дарованьми своими зело чудоносен,
Великодушна тщанья мраморы являют,
Щедру руку зданные храмы прославляют,
Такова Семирамис у Ефрата жила,
Яже ввеки памятно дело сотворила,
Елисавеф Британска скипетродержащи,
Пульхерия таковым умом бе смыслящи,
Россио: аще царствы многими почтенна,
Пред благочестивою еси умаленна.